Imponerande jegersportanlegg

I 2000 tok Samnanger jeger- og fiskarlag fatt på den siste utbygginga av anlegget til ein verdi på vel ein million. Med det er det ikkje få millionar som er lagde ned i pengar og dugnad for å få eit topp anlegg for jegersport ved skytebana i Gaupholmsmarka. Anlegget har no 12 kastemaskiner for leirduer, og ein ny standplass i tillegg til den overbygde laget hadde frå før.
I ein vanleg jegertrap-konkurranse fyk leirduene ut rett framfor skyttarane. Men i compact-sporting, som den spesielle konkurranseforma vert kalla, kjem duene frå alle kantar. Sume kjem inn frå sidene, andre rett imot eller rett ifrå; sume flaksar opp rett framfor skyttarane og atter andre kjem fykande bakfrå over hovuda på dei.
- Eg vil oppfordra jegerane til å koma opp og prøva seg. Det vert ei heilt anna trening enn før, og eg trur dei kjem til å lika dette. Og det er ikkje spesielt vanskeleg, påstår Ove Gåsdal, som lovar å programmera maskinene så det vert passeleg lett.
For her som i mange andre sportsgreiner er det datateknologi som styrer ståket. På compact-sportinga laurdag kjørte dei på dublettar. Ikkje før hadde ei leirdue kome fykande frå ein kant så var ei anna i lufta frå ein heilt annan kant. Så her gjaldt det å ha augene med seg og brenna av kvikt nok mot den første for å vera klar til å sikta seg inn mot den andre.
Imponerande, syntest Samningens utsende.

- Imponerande!
Og det var han ikkje åleine om.
- Eg er imponert over anlegget, sa Per Øyvind Asbjørnsen frå Bykle JFF. Saman med den utflytta bergensaren Tom Vatslid og Liv Mandt var han på studietur for å sjå på anlegget og henta tips til NM som Bykle JFF skal skipa til på Hovden i juli. Hovden er velkjend som vintersportsstad, men no vil dei også ha det til å skje noko sumarstid. Så vesle Bykle JFF har teke på seg å få ferdig utbygd anlegg til å halda NM der i juli.
- Dette ser veldig bra ut. Dei har gjort ein kjempejobb, seier Vatslid i NM-komiteen. Han synest det er hyggjeleg å vera på stemne i Samnanger, og nyttar samstundes høvet til å ynskja alle velkomne til NM på Hovden.
Like frå Kirkenes kom Birger Ryeng i Sør-Varanger JFF og Robert Flatlie i Neiden JFF. Dei kom fram natt til laurdag og reiste heimatt sundag ettermiddag. Lang reis? Ja, men reisetida er kortare enn når dei kjører 45 mil for å delta i eit stemne i Alta, fortalde dei. Noko liknande anlegg som i Gaupholmsmarka må dei heilt sør til Mo i Rana for å finna. Og karane frå Kirkenes var også tydeleg imponerte over kva Samnanger JFL har fått til: - Det ser veldig bra ut!

Bjarte Linga i form
Vêrgudane var litt vrange sist helg, men ikkje verre enn at opningsstemna vart svært vellukka også når det gjeld resultat. I compact-sporting på laurdag var Paal Kråkenes frå Bergens JFF suverent best av dei 29 deltakarane med 91 av 100 mogelege treff. Vår eigen Bjarte Linga kom på delt 2. plass med 85 treff.
I 100-skotsstemnet i jegertrap sundag var det 46 deltakarar. Dei beste etter 100 skot skyt ein finale på 25 skot. Igjen viste Paal Kråkenes seg som den beste med heile 123 treff - berre to bommar på 125 skot. Men Bjarte Linga følgde hakk i hæl med 122 treff. Begge hadde fullt hus i finalen. Også Johannes Egil Kulild var mellom dei sju i finalen, og han kom på 4. plass med 119 treff.