Når anlegget til Samnanger jeger- og fiskarlag står ferdig utbygd seinare i haust, finst det knapt eit einaste anlegg på heile Vestlandet som kan by betre tilhøve for trening og konkurransar.

Ivar Bård Aadland
Lokalavisa Samningen

Samningens utsende har teke ein rusletur for å sjå seg om på anlegget ute ved skytebana saman med Ove Gåsdal, formannen i Samnanger jeger- og fiskarlag. Frå den første bana vart teken i bruk i 1986 har anlegget vorte bygd gradvis ut med overbygg over standplass, lagerbygg og ei bane nummer to som vart teken i bruk for eit år sidan. Anlegget i Gaupholmsmarka er det einaste i Hordaland med to baner.

- Det er fint å ha to baner på treningane. Då kan me bruka den eine til dei som treng instruksjon, medan dei aktive kan øva på den andre. Og det er eit kjempepluss i konkurransar. Det såg me ikkje minst under 100-skotsstemnet nyss. Skyttarane veksla mellom dei to banene, og stemnet vart raskt avvikla, fortel Ove Gåsdal.
Også jegersporten endrar seg. Den tradisjonelle jegerstien der deltakarane vandrar i terrenget og skyt frå ulike hald, er på veg til å verta avløyst av den nye konkurranseforma "kompaktsporting", eller berre "sporting". Då står skyttarane på same standplassen, men leirduene kjem flygande frå alle kantar - ikkje berre i ulike vinklar ut frå standplass.

Og Samnanger jeger- og fiskarlag følgjer med tida. Laget hadde planar om å laga gruslagde stiar ut i terrenget som skyttarane kunne gå på. Men då den nye konkurranseforma sporting, som også er NM-grein, dukka opp, vart planane lagde om. No skal det plasserast kastemaskiner ulike stader ute i terrenget. Og vegane laget har arbeidd opp på dugnad i haust, skal brukast til å frakta duer ut til kastemaskinene. I alt sju av dei ti nye maskinene laget har tinga, skal plasserast ute i terrenget slik at leirduene både kan koma sidelengs, over og mot skyttarane - i tillegg til den vanlege kasteretningen ut frå standplass.
Elektronikken og datastyringa har gjort sitt inntog også i denne sporten, så kastemaskinene kan programmerast alt etter kva retning skyttarane vil øva på. I konkurransar er det mogeleg å programmera svært vanskelege seriar. Men det er ikkje poenget, meiner Ove Gåsdal: - Det viktigaste er å ha baner som er fine å skyta på slik at skyttarane får gode resultat, meiner han. Og at bana i Gaupholmsmarka er mellom dei beste i så måte, vart til fulle prova på 100-skotsstemnet tidlegare i haust.
Den nyaste bana ligg rett framfor standplassen for 100 m baneskyting, som Tysse skyttarlag har. Difor kan ikkje standplass på den bana få fast overbygg. Men jeger- og fiskarlaget er no i ferd med å få laga opne "bur" med tak over slik at skyttarane kan stå nokolunde tørt når regnet høljar ned. Utan fast overbygg er det også mogeleg å flytta sjølve standplassen lenger bak, slik det vert gjort i den vanskelege OL-greina dobbeltrap.

Jeger- og fiskarlaget har fått lovnad på 348.000 kr i tippemidlar til million-utvidinga av anlegget. Det dekkjer mest heile kostnaden med dei nye kastemaskinene. Frå før har Frank Mohn-bedrifta skote inn 80.000 kr. Laget greier seg med eit lån på knappe 200.000, for resten vert gjort på dugnad. I tillegg til grøfting, vegbygging og grusing er det faste overbygget støyisolert. No står det att å laga rampar for kastemaskinene ute i terrenget. Den endelege plasseringa er det arkitekten og primus motor bak utvidinga av anlegget, Johannes Egil Kulild, som skal peika ut. Men han var på arbeid i Nordsjøen og kunne ikkje vera med på vandringa vår denne kvelden.
- Me er svært godt fornøgde med dugnaden i haust. Det har vore bra med folk og me har hatt god hjelp av folk med traktor, så me har fått utført mykje meir enn det me hadde tenkt, seier Ove Gåsdal.

Formannen i jeger- og fiskarlaget er elles ikkje berre oppteken av å ha eit anlegg som er førsteklasses reint sportsleg. Han vil også ha eit anlegg som er vakkert å sjå til og triveleg å opphalda seg på, både for skyttarane og familiar som slær følgje. Difor prøver laget å pynta opp med blomar, plantar og plen. Bak klubbhuset er det dessutan meininga det skal leggjast heller. Så når alt står ferdig og dei nye kastemaskinene er på plass seinare i haust, kan Samnanger jeger- og fiskarlag truleg skilta med det beste anlegget for jegersport på heile Vestlandet.